Unha crítica positiva

Actualmente parece que emitir unha crítica ten connotacións negativas e ninguén nos ensina como se fai. Con todo pode ser necesario que, como responsable dun equipo de traballo, como xefe ou lider dunha organización, teñas que facelo algunha vez. Unha boa crítica é clave para manter sas nosas relacións interpersoais e avanzar cara a un obxectivo común dentro dun equipo, resolver problemas e evitar que as diferenzas de opinión se repriman e exploten no peor momento. Así que, se tes que xulgar o traballo de alguén e facerlle saber que debe mellorar, axúdate con estes consellos:

 1. Boa comunicación. Asume a responsabilidade das túas opinións e polo tanto transmíteas ti mesmo, persoalmente e do mellor xeito posible, non mediante intermediarios, nin esperando "que se decate", nin por emails ou wasaps. 

 2. Empatía.   Antes de criticar pregúntate cal é o teu obxectivo, que é o que realmente esperas conseguir, cal é o impacto que vas causar na outra persoa e para que. Non fagas críticas só para o teu desafogo persoal, ten sempre en conta como lle vai afectar ao outro. A falta de empatía ao emitir unha crítica xerará hostilidade. Se a persoa se sente atacada defenderase en vez de rectificar o seu comportamento.

 3. Enfócate nas accións. Asegúrate de que o teu comentario estea centrado no que a persoa fixo ou deixou de facer e non o relaciones co seu carácter ou trazos de personalidade, porque se sentiría ferida e estaría menos receptiva ás túas suxestións.

 4. Non xeneralices. Fai unha crítica concreta e directa, con detalles específicos do que pode mellorarse ou do que saíu ben e pode perfeccionarse no futuro. Evita términos como sempre, nunca, todo, nada, etc . Mesmo que que algo saia mal en varias ocasións, non significa que sexa un trazo permanente nunha persoa, pero cando alguén percibe un fracaso como un defecto persoal parécelle inevitable e se desmotiva.

 5. Unha de cal e outra de area. Nada máis frustrante que unha crítica que non vai acompañada dunha proposta de mellora. Se temos algunha crítica que facer será porque podemos comparar a actuación criticada con outra que sería preferible, pero se non existe outra, a nosa crítica non pode aportar nada á situación. A crítica só ten utilidade si presenta opcións que a persoa criticada non vira antes.

 6. Respecto. As críticas humillantes destrúen o vínculo entre as persoas. Utilizar un erro doutra persoa para rirnos dela ou para sentirnos mellores ca ela impide a colaboración futura.