Levamos un ritmo de vida acelerado, comemos sen xeito e en ocasións realizamos dietas para perder peso que privan ao organismo de nutrintes fundamentais. Actuamos así durante anos porque os prexuízos, na maioría dos casos, non se aprezan ata moitos anos despois.Como xa se aproximan os exames de setembro e a "Volta ao cole" é interesante reflexionar sobre a alimentación.
Alimentar ben o cerebro, xunto con outros hábitos de vida saudables como facer exercicio físico regularmente e evitar o estrés, axuda a previr accidentes cerebrovasculares e enfermidades neurodexenerativas. Aínda máis, un cerebro ben nutrido rende mellor en momentos de fatiga, está máis atento, concéntrase mellor e é capaz de realizar dun xeito máis eficiente as súas funcións básicas diarias. O cerebro representa só o 2% do noso peso pero necesita ao redor do 20% da enerxía que inxerimos. En función dos nutrintes que reciba, a súa actividade será diferente. É dicir, o que comemos repercute inmediatamente na produción dos sinais químicos do cerebro. Estas substancias, responsables da transmisión de información ao longo do sistema nervioso, son os chamados neurotransmisores, e poden modularse en parte coa alimentación. Por medio dela poderiamos influír sobre o noso humor e o comportamento, axudar a aliviar a depresión, a ansiedade, a neurose e os trastornos do sono.
Para mellorar a saúde e as funcións do cerebro a través da alimentación, son fundamentais alimentos coma estes:
- Auga. É o compoñente maioritario do corpo humano, non podemos vivir sen hidratarnos ben e nas persoas que fixeron folga de fame comprobouse que é posible sobrevivir máis dun mes sen alimentos sólidos pero sen auga non se resiste máis de 15 días. A auga debe considerarse como un verdadeiro nutrinte e sen ela a vida non é posible. As necesidades de auga varían en función do peso corporal, actividade física, etc. pero en calquera caso o cerebro, que contén un 91% de auga, necesita hidratarse regularmente.
- Brócoli. É a raíña das crucíferas (coliflor, col, nabos...) Ten poucas calorías, proteínas e azucres, apenas graxas, moita auga, fibras, vitaminas e minerais. O brócoli é unha verdura antioxidante extraordinaria para a saúde con moitos folatos beneficiosos para a memoria.
- Plátano. Os diabéticos deben consumilo con moderación. Bos azucres, boas vitaminas e minerais. Ademais polo seu baixo contido en sodio prevén a retención de líquidos. Contén glúcidos complexos que dan enerxía de longa duración para deportistas, nenos, anciáns, etc., mentres a vitamina B6 intervén na síntese da dopamina, un neurotransmisor que inflúe na memoria e o bo humor.
- Té verde. Ultimamente asistimos a unha revalorización do té verde, que non se fermenta, porque é baixo en excitantes e rico en antioxidantes. Algúns estudos revelan que impide o desenvolvemento de determinados tumores e protexe as funcións cerebrais. Se queres obter un sabor perfecto non fervas demasiado a auga nin deixes infusionar demasiado tempo: tres minutos a uns 70 grados é suficiente.
- Peixe azul. Por que hai tantos alimentos "enriquecidos" con omega-3? Porque forman parte das células, son básicos para as funcións neuronais e participan na formación da retina, pero só nos chegan a través da dieta (peixe azul, aceites de soia e froitos secos como as noces). Para conseguir niveis óptimos de omega-3 hai que consumir peixe azul 3-4 veces por semana.
- Noces. Son o medicamento máis natural para o corazón e o máis antioxidante. Recoméndase tomar tres ou catro todos os días, non máis porque son calóricas e engordan. Realmente protexen das enfermidades do corazón, fluidifican o sangue, equilibran o colesterol e os triglicéridos, melloran as capacidades de aprender e os trastornos de humor.
- Queixo parmesano. É moi rico en calcio, contén fósforo, vitaminas e proteínas de calidade, polo que está recomendado para nenos, adolescentes e embarazadas, xa que axuda a manter os ósos e dentes sans. Excelente fonte de tirosina, un aminoácido precursor da dopamina, que favorece a memorización e a aprendizaxe.
- Espinacas, endibias e pipas de xirasol. Son ricas en acido fólico, que intervén en reaccións metabólicas importantísimas e na formación, desenvolvemento e maduración dos glóbulos vermellos, que levan o osíxeno desde os pulmóns a todas as células do organismo. Acido fólico e ferro, gran combinación para mellorar o rendemento cerebral. Se es carnívoro tamén podes obter estas vantaxes comendo fígado. As pebidas poden tomarse no canto de lambetadas azucaradas, conteñen graxas poliinsaturadas, proteínas, carbohidratos, moita vitamina E, acido fólico e fibra, flavonoides, ferro, magnesio, outeiro, betaina, lignanos e fitoesterois. Preveñen as enfermidades cardiovasculares e os ataques cerebrais (ictus), reducen o colesterol, protexen o sistema arterial, axudan ao desenvolvemento cerebral... Pero claro, mellor sen sal e sen abusar.
- Pemento. É un dos alimentos máis ricos en vitamina C, o vermello incluso supera aos cítricos, o problema é que se perde coa cocción. Ten tamén outras vitaminas, acido fólico, fibra, magnesio, cobre, antioxidantes... Segundo traballos recentes pode mitigar e axudar ás persoas co mal de Alzheimer.
- Chocolate. É unha auténtica marabilla: favorece a produción de endorfinas, pero talvez por iso moitas persoas abusan do seu consumo. Unha onza de chocolate ao día axuda a previr problemas cardiovasculares, a reducir a presión arterial, beneficia o sistema circulatorio, aporta vitaminas e minerais. Ademais, o cacao diminúe a formación de radicais libres que causan cancro e avellentamento prematuro. Falamos de chocolate auténtico, mellor sen leite, 70% de cacao.
Como eu prefiro falar en positivo, enfoquei así esta entrada, pero tamén podes atopar na Rede información sobre alimentos prexudiciais, por exemplo AQUÍ.
E non esquezas que para osixenar o cerebro ademais son convenientes o exercicio e as comidas lixeiras e frecuentes.
Ningún comentario:
Publicar un comentario