O extraordinario desenvolvemento dos medios de comunicación de masas nas últimas décadas puxo toda clase de información ao alcance da sociedade e anque pode supoñer un avance para o coñecemento e a liberdade das persoas, paralelamente se desenvolveron novas técnicas de control de masas para dificultar o acceso a toda esa información disponible, de maneira que na práctica as cousas cambian para seguir igual. Agora xa non se impide que o pobo se informe ocultándolle cousas senón todo o contrario, saturándoo de datos falsos e irrelevantes sobre o tema do seu interese ata conseguir que abandone a súa procura, exactamente igual que naquelas técnicas para deixar de fumar consistentes en fumar en exceso ata vomitar. O vómito informativo sobre algúns temas en concreto serve de pista ao disidente para saber cales son os temas que aos coordinadores da farsa mediática lles convén silenciar. Todo está aí, mesmo os contidos máis minoritarios, especializados ou esotéricos, actualmente todo está ao alcance da man, a dificultade xa non estriba en atopar o que procuras senón en recoñecelo, discriminar o verdadeiramente relevante do trivial, o blogueiro ben informado do farsante, o especialista do afeccionado, o profesional comprometido do oportunista.
Ningún comentario:
Publicar un comentario