Estou de baixón

A depresión é unha das causas máis frecuentes para buscar axuda psicolóxica en todo o mundo. É verdade que todos podemos ter cambios repentinos de humor ou sentirnos tristes de cando en vez, pero a depresión é algo que se dá especificamente cando estes síntomas comezan a afectar a vida “normal” da persoa prolongándose no tempo (dise que máis de dúas semanas, pero a verdade é que non podemos dar tempos específicos porque hai excepcións, por exemplo, en casos de dó).

A depresión trae consigo unha sensación de perda, baixa autoestima, desamparo, sensación de que a nosa vida está fóra do noso control e mesmo que un ten a culpa das cousas malas que lle suceden.

Algúns síntomas frecuentes son:

- Todo che dá igual, esqueces cousas que adoitaban ser importantes e indispensables para ti, xa non queres saír con ninguén, ou falar con ninguén, nin sequera cos teus mellores amigos, non tes ganas de facer nada 
- Paréceche que a vida non ten sentido e gustaríache desaparecer (aínda que non sabes moi ben o que isto significa)
- Non tes forzas para saír da casa, dache preguiza, mesmo che dá preguiza levantarte da cama, facer a comida, coidar do teu aspecto físico
- Móveste entre estremos, de pasar o día sen comer pasas a devorar compulsivamente todo o que atopas para calmar a ansiedade, de permanecer insensible a todo pasas a chorar sen poder parar...
- Percibes selectivamente sen darte conta; todas as cousas que che suceden parecen similares, mesmo se en realidade non están relacionadas, tendes a xeneralizar e extrapolar as situacións.
- Tendes a ver as cousas como boas ou malas, brancas ou negras en lugar de notar que pode haber termos medios (como adoitaba suceder antes de que todo isto comezase)
- As túas lembranzas están algo borrosas, esqueces as cousas que che sucederon ou o que queres facer; tamén pode ser que non poidas concentrarte como antes, así que ler libros, escribir ou manter conversacións cústache máis ou tardas máis tempo en facelo: as túas habilidades cognitivas atópanse temporalmente diminuídas.
- O único que sentes é dor e ademais de todos estes síntomas digamos psicolóxicos, a depresión que pode ser a causa de que non cures rápido as infeccións, que sexas máis susceptible a certas enfermidades (porque o teu sistema inmune está moi debilitado), que teñas dores inexplicables, entre moitas outras cousas.

Debes comprender que isto é unha enfermidade e precisas axuda profisional. Non te culpabilices, o mesmo que non o farías se fose unha gripe ou outro problema de saúde máis do corpo físico e non do mental.