Cando o Budismo chegou a China, alí considerouse máis natural que a compaixón fose representada con aspecto feminino. Así o Bodhisattva Avalokithesvara pasou a identificarse con Kwan Yin, entidade que xa existía desde moito antes, talvez dentro do marco da antiga tradición da Deusa en Persia. O primeiro monxe budista e tradutor que se referiu en feminino a Kwan Yin foi Kumarajiva na súa tradución ao Chinés do Sutra do Loto no 406 da nosa era. Das trinta e tres (o número que se relaciona con ela) aparicións do bodhisattva na tradución, sete son en xénero feminino. Isto que pode parecer unha contradición, non é tal dentro da visión budista, xa que un bodhisattva non é masculino nin feminino (similar aos anxos do cristianismo), e pode manifestarse tanto como home ou como muller, neno, animal, etc. dependendo do ser a quen quere socorrer. Como di o Sutra do Loto sobre Kwan Yin: "recorre a varios recursos ou medios e viaxes polo mundo, levando os seres á salvación."
Ata o século X, seguiuse representando a Kwan Yin en aspecto masculino pero pouco a pouco a imaxe do bodhisattva como unha fermosa Deusa vestida de branco foi crecendo en popularidade. Para o século IX xa había unha estatua da Deusa en cada mosteiro budista de China.
De acordo cunha crenza popular chinesa, Kwan Yin vive na illa de Pu-tuo-shan (O mundo de Lapislazuli), onde está o seu palacio sagrado. Aparece frecuentemente no ceo ou sobre as ondas, para salvar aos que a chaman en situacións de perigo, ou á beira de persoas doentes, sobre as que rocía unhas pingas da súa auga curativa que leva nun equeno envase. Cando se representa levando unha gavilla de arroz maduro ou unha cunca con grans de arroz, é como símbolo da súa capacidade de xerar fertilidad e sustento. As imaxes portando un loto branco fan referencia á súa pureza. Algúns símbolos asócianse característicamente con Kwan Yin como a ponla de salgueiro, antigo símbolo chamánico da cultura chinesa que o vincula á facultade de comunicar cos mundos espirituais e tamén símbolo da femineidade; Outras veces as representacións de Kwan Yin van vinculadas ás do Dragón, poderoso símbolo de espiritualidade, sabedoría, forza e poderes divinos de transformación. Tamén hai curiosas representacións de Kwan Yin con mil brazos, ou con mil ollos, representando os diferentes medios para salvar aos seres sentintes. As súas mans adoptan ás veces a forma do Yoni Mudra, simbolizando a matriz como a porta de entrada a este mundo a través do principio universal feminino. Do mesmo xeito que Artemisa, é unha Deusa virxe que protexe ás mulleres sendo propicia tanto ás que optan por unha vida relixiosa retirada como a aquelas que desexan matrimonio e descendencia. En Vietnam, Kwan Yin é invocada como protectora en tempo de desastres naturais, e patroa daqueles cuxas vidas dependen dos elementos, polo que soe estar presente nos altares de labregos e pescadores. Na teoloxía budista Kwan Yin é ás veces presentada como o capitán do "Barco da Salvación", guiando almas ao Paraíso do Oeste de Amitabha, ou a Terra Pura, a terra de bendición onde as almas poden renacer para continuar recibindo instrución ata chegar á iluminación e a perfección.
Algunhas correntes metafísicas e vinculadas aos ensinos dos "Mestres Ascendidos" teñen unha visión algo diferente de Kwan Yin. Así, afirman que ten un templo chamado "Templo Etérico da Misericordia" localizado sobre Pekín e que está rodeado de 12 pequenos templos, onde habitan lexións de seres ao seu servizo. Ela dirixe a Chama de Misericordia e Compaixón, e ela é un dos que están a cargo de exercer actividades de sanación sobre a humanidade na terra. Kwan Yin é membro do Equipo Kármico. O seu raio é o Raio Violeta da Conciencia Crística.
Tamén se relaciona con técnicas de manexo das enerxías como Magnified Healing.
Kwan Yin, é a manifestación do feminino, a Nai Cósmica, similar a outras figuras de culturas e relixións de profunda raigame histórica como Isis, Tara ou a María do Cristianismo, chegando a utilizarse imaxes de Kwan Yin para adorar á nai de Xesús entre os cristiáns chineses, xa que Kwan Yin representada como "A honorable das roupas brancas", parece unha virxe cristiá. Non nos debería estrañar que tanto orientais como occidentais manifesten de xeito similar os principios de misericordia, amor incondicional e santidade.
Para min Kwan Yin é un Yidam (deidade que mora no noso propio corazón), non adscrita a un credo determinado, disposta a darnos o seu amor, misericordia e axuda sen importar que sexamos dun credo ou doutro. A devoción á Kwan Yin trae como consecuencia un profundo amor e desexo de servizo a todos os seres vivos, e desta forma de actuar nacerá necesariamente un mundo mellor.
Fermoso blog dedicado a Kwan Yin
Máis mantras e oracións a Kwan Yin
Magnified Healing en España
Ningún comentario:
Publicar un comentario